Maxfiylik va ma'lumotlardan foydalanish

Bu sahifada platforma qanday ma'lumot yig'ishi, ular nima uchun kerakligi va qayerda saqlanishi oddiy tilda tushuntirilgan.

Qanday ma'lumot saqlanadi

• Ism, familiya, login va parol (parol shifrlangan holda — uni hech kim, hatto administrator ham ko'ra olmaydi).
• Kursdagi progress: o'tilgan bosqichlar, test natijalari, yuklangan amaliy ishlar va o'qituvchi izohlari.
• Guruh ishi: diagnostika javoblari, baholar va refleksiya javoblari, xonadagi kod va chat xabarlari.
• EduBot'ga berilgan savollar va javoblar.
• Platforma haqidagi so'rovnoma (SUS) javoblari.
• Telegram'ni ulasangiz — faqat chat raqami (telefon raqamingiz emas).

Nima uchun kerak

• O'qish va baholash jarayonini yuritish: natijangizni siz va o'qituvchingiz ko'radi.
• Ilmiy tadqiqot: hamkorlik kompetensiyasi rivojini o'rganish. Tadqiqot hisobotlarida ism yozilmaydi — har bir o'quvchi O-01, O-02 kabi kod bilan ko'rsatiladi.

Kim ko'radi

• Siz — o'zingizning barcha ma'lumotlaringizni.
• O'qituvchingiz — faqat o'z guruhidagi o'quvchilar natijalarini.
• Jamoadoshlaringiz — xonadagi umumiy kod va chatni. Siz qo'ygan baholarni ular ko'rmaydi.
• Ma'lumotlar uchinchi shaxslarga sotilmaydi va reklama uchun ishlatilmaydi.

EduBot haqida muhim

EduBot javob berishi uchun savolingiz (guruh xonasida — joriy kod ham) Anthropic kompaniyasining Claude sun'iy intellekt xizmatiga yuboriladi. Shuning uchun EduBot'ga ism, telefon, manzil kabi shaxsiy ma'lumotlarni yozmang.

Qayerda saqlanadi

Ma'lumotlar O'zbekiston hududidagi serverda saqlanadi («Shaxsga doir ma'lumotlar to'g'risida»gi qonun, 27¹-modda) va har kuni zaxira nusxasi olinadi.

Voyaga yetmaganlar

18 yoshga to'lmagan o'quvchi platformadan ota-onasi yoki vasiysining roziligi bilan foydalanadi. Rozilik shakli ta'lim muassasasi orqali to'ldiriladi.

Sizning huquqlaringiz

• Ma'lumotlaringiz bilan tanishish va xatosini tuzattirish.
• Tadqiqotda ishtirok etishdan bosh tortish yoki hisobingizni o'chirishni so'rash — o'qituvchingiz yoki administratorga murojaat qiling.
• Telegram xabarnomalarini istalgan vaqtda o'chirish (botga /stop yozing).